المطاردة

المطاردة
كلمات\السنوسي محمد عثمان

راقد علي سطح الشمس
بي لهفة
منتظر المغيب
راقد يساسك ومفتكر
انو المغيب
حيكون قريب
ما قلنا ليك انسي المغيب
فكر في واقعك
والشمس
واحسن تطاطي وتقتنع
وفتش كمان المتعة في
غليان عروقك
واحترق
افني ..وموت!!
كونك تكون في تاني طابق
منتشي وحيران
وجواك رغبة انك بس تكون
وحليلك المسكين
ما قادر تكون
تطلع سريرك شان تنوم
تسرح في بلكونتك تشوف
احلامك المرجوة بتاشر عليك
وحتمية العجز لسة جواك في العروق
تصرخ تقاوم وتنطفد
وتنط من البلكونة لي وش الارض
يتعتم الكون ويتملي
لون لاهو ابيض لاهو اسود
زي رماد..
واتكبلت رجليك حديد
وبين استحالة الرؤية والتكبيل تشوف
نفس الحلم..
حلمك تشوفو في الملامح زاتا
بيقول ليك تعال...!!
اكسر قيودك شان تصل....
وتبدا المطاردة في المحال...!!
وكل ما تقول توصل حلم
يظهر ضباب ويضيع حلم
تيأس تقيف ...
لو من عدم يظهر حلم ..
وتبدا مشوار من جديد
ونفس النهاية الفايتة
ضاع منك حلم
ويجيك صوت جاي من بعيد
اغمض عيونك شان تشوف
تغمض عيونك وتفتحا
وتشوفا كل احلامك ارتفعت بعيد
ورمت خيوط شان ترتفع انتة
وتطير..
وكتين تحاول تمسك الخيط
تستمع لي صوت ضعيف بينادي ليك...!!
صوت نفس صوتك في الارض
بي نبرة تشبة نبرتك
تسأل منو..؟
ويجيك جواب :
انا ياني منك ومن زمان ليك
منتظر..
راجيك وصبري نفد
مستني يوم يجمعنا جد
تسأل منو ..؟
ويجيك جواب :
انا قدرك المحتوم عليك
انا جسدك المنك وليك
تسأل منو ..؟
ويجيك جواب :
انا جثتك...!!!!!
حتميتك الراجيها جات
ومغيبك المنتظرو في سطح الشمس
بستقبلك....
حدفك هنا

جوبا29اغسطس2007

جزيل الشكر استاذ ابراهيم
سلمت علي مرورك الانيق

خالص الود

كلمات رائعه كصاحبها
_______
تقبل مروري

سلمت وسلم قلمك الرائع