اظلام ...

موضوع: اظلام ... الثلاثاء سبتمبر 08, 2009 11:48 am

اظلام

ستائر مسرحك فتحت علي
اظلام تمام
اسبوط في اعلي الوسط
دخان مؤثر صوت بكا
اطفال صغار وسط الزرع
بتجارو جاي بتجارو جاي
والضحكة لي نص الوجوة
حمودي من اسفل يمسن
يظهر يقيف يرفع يعاين لي بعيد
وامو في وسط اليسار
قاعدة وتغسل في الهدوم
حمودي قال
يا يمة كل الشفتو داك خير حقنا
قالت لية صاح
حقك وحق اخوانك السارحين هناك
بي خطوتين يجي لي قريب
ماف زول حيقلعو مننا
الام توقف للغسيل وتضم وليدا
وهي بتقول
لا لا ياولدي العزيز الله في
حمودي صنقع في السماء
وبي عزيمة قال
يا يمة لمن ابقي زول
حارفع بلادي وادي المساكين حقهم
الام تواصل في الغسيل
حمودي يا ولدي العزيز
المساكين ليهم رب بحفظم
حمودي ونحنا يا يمة
الام مواصلة في شطفها
ربهم ياهو ربنا
حمودي فكر في الكلام ولي امو قال
لا ربهم ما ربنا
الام تقف للغسيل
كيف يا ولد ...
حمودي لوكان صحي كان وضعهم زي
وضعنا ....
وفي اللحظة ديك اظلام ..تمام
جات الاضاءة الفل كمان
حمودي واقع في الارض
ببكي وبقول
يا يمة لا ما تموتي لا
والام في اعلي اليسار
واقعة وغريقة في دمها وناسا كتار
شايلين سلاح
جاريين من اسفل ياسر لي وسط يمين
خربو الزرع .. كتلو البهايم والطيور
اضاءة خافتة
الدنيا ضاقت في عيون حمودي والكون
اتملا احقاد وموت
حمودي في وسط الوسط
ببكي وبقول يا ربي هسي امش
لي وين ...
للمساكين ...
صوت من وراء ماف زول هناك كلهم مشو
وحمودي في وسط الوسط
يا ربي هسي اروح لي وين؟
للشايلين السلاح ورافعنو في وش البشر
صرخات وضحكات من ورا
الوان كتير ملخبطة
وحمودي حيران في الوسط
يجري هنا لا بي هنا ... لا بي هنا
يصرخ باعلي صوت يقول
وين ربي وين..؟
رين ربي وين ؟؟
رب اليتامي والمظاليم من زمان ....
رب الصغار الضايعين في نار جحيم ....
رب المناضلين ببحثو في معني اليتيم ....

اغسطس 2007جوبا

موضوع: رد: اظلام ... الجمعة أكتوبر 09, 2009 8:24 am

كلمات جميلة أخي الكريم

واسلوب رائع

دمت بحفظ الرحمن

موضوع: رد: اظلام ... الإثنين يناير 25, 2010 10:02 am

جزيل الشكر اخي الاسمر ...
خالص الود والتحايا